Sólorkuteam
Staff 1
Staff 2
Staff 3
COVID-19 í vetur og í vár

Fyrst kemur ein frágreiðing um, hvørji átøk, vit fremja til (1) at taka neyðug heilsulig atlit; og (2) at tryggja tað góða innihaldið í vitjanum okkara. Síðani er ein kunning um, hvussu serfrøði, ábyrgdir og avgerðir verða býttar millum myndugleikarnar, Sólorku, læknar og tryggingarfeløg. 

 

 

1. HEILSULIG ATLIT

 

Hóast okkara øki í Spania - Alicante-provinsurin á Costa Blanca  og Gran Canaria - hava verið lutfalsliga lítið plágað av koronasmittuni, fylgja vit teimum leiðreglum, sum galda givna tíðarskeiðið. Fremsta uppgáva okkara er at veita okkara gestum eitt so trygt og gott uppihald, sum tilber. Vit skapa tryggasta góðalív sunnanfyri við m.a. hesum átøkum:

 

Okkara vanliga tænasta

Sólorka er einasta fyritøka av sínum slagi í Føroyum eins væl og í Spania. Okkara fremsta mál er at skapa tað góða lívið innan tryggastu karmarnar - heilsuliga, fíggjarliga og operationelt. Vit eru ikki ein ferðaskrivstova, sum sendir sínar kundar út í heim. Vit eru hinvegin ein vertur, sum tekur móti okkara gestum á staðnum. Hetta gevur okkum serligar møguleikar at vera um teg sum gest og at veita tær tryggar umstøður, álítandi tænastur og eitt dygdargott innihald. Vit skapa tryggleikan við

  • einum starvsfólkatoymi, sum er um okkara gestir allan sólarringin - eisini um teir av óvæntaðari orsøk noyðast at vera verðandi longur á staðnum

  • brúki av føroyskum og sponskum máli, so øll skilja okkum

  • strongum eftirliti við gistingarhúsum, bussum o.ø.

  • tøttum samstarvi við læknar og sjúkrahús

  • okkara egnu sjúklingakonsulentum

  • okkara egna føroyska lækna á øllum vár- og heystsetunum

  • skandinaviskum lækna á Gran Canaria

 

Okkara serliga Covid-19 tænasta

Vit fylgja gongdini og taka stig samsvarandi. Vit kunnu nevna, at vit, meðan smittan enn órógvar

  • hava egnan koronu-serfrøðing

  • bert flúgva beinleiðis við afturlatnum bólkum við lítlari atgongd til onnur

  • krevja kanning undan fráferð, hava fólk sjúkueyðkenni

  • taka serlig atlit undir útferðum

  • hava støðugt eftirlit við hotellum, bussum otl.

  • stremba eftir at veita tilboð um alternativt ferðamál (í evsta føri, um tað er neyðugt)

 

Flúgving

Til sólorkuseturnar ferðast gestir okkara í okkara beinleiðis leiguflogførum. Til Gran Canaria verður ferðast í beinleiðis rutuflogførum. Atlantic Airways tekur tey bestu stigini til at vaska og sóttreinsa flogførini. Flogførini hava harafturat ta allarbestu luftskiftis-skipanina, har filtur reinsa møguliga smittu í luftini.

 

Samstarvspartar okkara á staðnum

Vit samstarva við nakrar fáar vælvaldar fyritøkur, sum vit harafturat hava strangt eftirlit við. Vit brúka bussar, sum verða væl vaskaðir og reinsaðir. Gistingarhús okkara taka umfatandi lógarkravd stig til tess at verja móti útbreiðsluni av smittu.

 

 

2. INNIHALD

 

Covid-19 ávirkar lívið kring allan heimin. Soleiðis er eisini í Spania, har myndugleikarnir støðugt fylgja gongdini og seta hóskandi tiltøk í verk, um smittan kyknar lokalt. Summir tættir í uppihaldinum í Albir ella á Gran Canaria kunnu tí gerast eitt sindur øðrvísi, enn vant, soleiðis sum teir eru í flest øllum londum. Endamálið er her sum aðrastaðni at skapa eitt so trygt umhvørvi, sum tilber.

 

Kjarnuveitingarnar

Vit kunnu tó skipa so fyri, at okkara kjarnuveitingar (tær, sum eru roknaðar inn í fasta prísin) verða sera lítið ávirkaðar. Orsøkin er, at vit eru ein felags-bólkur, har vit hava fulla greiðu á, hvørjir allir limirnir eru, har øll koma frá sama smittufría umhvørvi, og har eingin kennir seg sjúkan.

 

Ískoytisveitingarnar

Vit meta heldur ikki, at hesar tænasturnar (sum goldið verður sjálvboðið fyri á staðnum) verða ávirkaðar munandi. Við teimum tiltøkum, sum bussfeløgini fremja, ber t.d. til at skipa fyri flestu útferðunum, soleiðis sum tær eru ætlaðar. Tað er vanligt, at Sólorka hevur ein bruttohóp av útferðum, haðani vit undir hvørjari vitjan sær velja burturúr. Ivast vit í onkrum einstøkum føri í trygdini, ella er okkurt stað stongt, leggja vit júst tann túrin burtur ímillum. Talið og støðið á útferðum og tiltøkum verður sum vant.

 

Lívið uttan fyri Sólorku-umhvørvið

Størsta ávirkanin kann verða á vanligt turistsamband millum okkara gestir og spanska umhvørvið uttan fyri Sólorku. Tað kann henda í vetur ella komandi vár, at onkrar leiðreglur framvegis verða galdandi viðvíkjandi stødd á hópum, frástøðu, reinføri, munnbindum og øðrum. Hesar skifta, sum tíðin líðir, men vit vænta ikki, at tær verða truplar at halda.

 

 

3. TEY YMSU ÁBYRGDARØKINI

 

Ábyrgdarøkið hjá myndugleikunum

Tá tað ræður um spurningin, hvørt ein vitjan verður útint ella ikki, heldur Sólorka seg strangt til vegleiðingarnar frá myndugleikunum. Hetta kann t.d. gera seg galdandi, tá vandi er fyri avleiðingum av yvirgangi, kríggi, náttúrurvanlukkum, sjúkum ella øðrum. Vit fylgja myndugleikunum, tí at teir hava betri vitan og serfrøði til at meta um støðuna, og tí at tað kann hava bæði heilsuligar og umfatandi tryggingartekniskar ella aðrar formligar avleiðingar, um vit ikki gera tað. Sólorka brúkar sostatt júst somu skipan sum aðrir ferðasmiðir, ferðaskrivstovur, flogfeløg, tryggingarfeløg og onnur.

 

Í okkara føri er fremsti myndugleikin danska uttanríkisráðið, sum grundar sínar avgerðir og ráðgeving á tilmæli frá fleiri stovnum, teirra millum Heilsustýrinum og Serumstovninum.

 

Ábyrgdarøkið hjá Sólorku

Sólorka tekur støðu til, hvussu vit á besta hátt fylgja galdandi leiðreglum og vísa skilagóð atlit, uttan at hetta órógvar upplivingarnar hjá gestunum ov nógv. Hetta gera vit fyri at fáa tað góða lívið, sum eyðkennir okkum, undir so tryggum umstøðum, sum tilber. Í sambandi við Covid-19 gera vit hetta í samstarvi við Pál Weihe, yvirlækna og professara, umframt við spanskar myndugleikar.

 

Ábyrgdarøkið hjá læknum og tryggingarfeløgum

Í summum førum kunnu gestir, sum hava teknað seg til eina vitjan, ivast í, um teir eru egnaðir til at vitja uttanlands, eitt nú vegna sjúku ella brek. Sólorka kann ikki taka dagar ímillum støðuna hjá okkara ymisku gestum. Í tílíkum høpi er mannagongdin hon, at viðkomandi leitar sær ráð hjá lækna sínum. Metir læknin ikki, at tað er ráðiligt, at viðkomandi vitjar uttanlands, skal hann ella hon tosa við tryggingarfelag sítt um treytirnar fyri avlýsing. Sum kunnugt mæla vit altíð staðiliga til at hava hóskandi ferðatrygging og avlýsingartrygging.

 

Grundin til, at tað – sum ávíst í viðskiftatreytunum – ikki ber til at fáa goldin gjøld aftur frá Sólorku, um gestir avlýsa, tá farið er út um freistirnar, er, at Sólorka bert ræður yvir einum lítlum brotparti av inngjøldunum. Tey verða rindað ella sett í veð mótvegis flogfeløgum, hotellum, bussfeløgum og øðrum undirveitarum. Eitt nú leigar Sólorka mangan heil flogfør til at flyta sínar gestir við. Hesi hava ein frammanundan avtalaðan kostnað, sum Sólorka heftir fyri.

 

Støðan er øðrvísi, um myndugleikarnir broyta sínar tilráðingar á ein hátt, sum ger, at tað ikki ber til at útinna vitjanina yvirhøvur. Tá fáa gestir okkara inngjøldini aftur uttan læknaváttan otl.

FAROE ISLANDS (PARENT COMPANY)

Sólorka Spf.

Tróndargøta 8, F0-100 Tórshavn, Faroe Islands

Email: solorka@solorka.com


SPAIN

Avenida La Nucía 63, casa 16

03590 Altea (Alicante)

SÓLORKA / CROSSBORDER - UNITED KINGDOM

Queries & booking
Unn Hilduberg, Head of Services,
Email: unn@solorka.com

Premier Sports Holidays Ltd.

Unit A, Ensign House, Battersea Reach,

Juniper Drive, London SW18 1TA, UK
Company Number: 10990009 England/Wales

SÓLORKA / CROSSBORDER - DENMARK

Queries & booking:

Martin Dirch Brodersen, Tour-Consultant 

Email: martin@crossborder.dk
Tel: +45 53632809

Sólorka Europe Spf.
Company Number: 5617 (Faroe Islands)

Rejsegarantifonden reg.nr.2917